તારો કાગળ રોજ મળે છે ...(પ્રભુને પત્ર)

પ્રિય પ્રભુ,

તારો કાગળ રોજ મળે છે ...
તડકો જાણે થઈ ટ્પાલી તારો કાગળ લાવે,
કુદરત જાણે તારા અક્ષર ખૂબ વ્હાલથી વાવે ...
રોમરોમને કળ વળે છે
તારો કાગળ રોજ મળે છે ...

પરબિડિયુ ઉઘડેને એમ જ ઊઘડે ફૂલ સુગંધ,
સંબોધનમાં ઝાક્ળ વાંચી ઝાંખો થાય સંબંધ ...
પ્રેમ આ તારો પળેપળે છે
તારો કાગળ રોજ મળે છે...

તુ ઉકલે ને જન્માક્ષ્રરોને ટાઢક વળતી લાગે,
મારુ જીવતર તારા માટે શ્વાસે શ્વાસે જાગે ...
સપના જેવી સાંજ ઢળે છે
તારો કાગળ રોજ મળે છે ...

મૂંગો બાળક સાદ કરે ને એવો મારો સાદ,
તું પણ બોલે શબ્દ વગરનુ તો પણ તું વરસાદ
ચોમાસામાં આંખ ગળે છે
તારો કાગળ રોજ મળે છે ...

લિખિતંગ હું વાંચુ ત્યાં તો તું ઊભો  છે સામે
આવી રીતે મળતો હો તો કાયમ માટે જામે ...
તું મારામાં ઓગળે છે\
તારો કાગળ રોજ મળે છે ...
- અંકિત ત્રિવેદી