નિર્મમપણે કશુંક નિતારી જુઓ તમે
અર્થાત આ સમયને વિસારી જુઓ તમે
ઘટના બધી યે તેજની અહીંયા પરોક્ષ છે
દીવસળી વિષે જ વિચારી જુઓ તમે
ચહેરો અમૂર્ત છે એ નિર્વિવાદ છે, ફકીર
દર્પણને સ્વસ્થતાથી સ્વીકારે જુઓ તમે
હું યે સ્થિતિસ્થાપક હતો પથ્થર ને પળ સમો
એ તથ્યોનો સંકોચ પ્રસારી જુઓ તમે
વાદળની જેમ વિશ્વ પલાયન થઈ ગયુ
અટકળમાં અંતરિક્ષ ઉતારી જુઓ તમે
પાસો શકુનિનો તમારુ નામ છે, કબૂલ!
એકાદ બાજી તે છતાં હારી જુઓ તમે
વાયુ વ્યથા વિચાર ને ઈશ્વરની ધારણા!
સાપેક્ષ છે બધુંય - વિચારી જુઓ તમે ....
- હરીશ મિનાશ્રુ
