અમે રાખમાંથીયે બેઠા થવાના...

'દરેક દિવસ તમારી જિંદગીનો છેલ્લો દિવસ છે એમ માનીને જીવી જાવ. એક દિવસ તમે જરુર સાચા પડવાના!'
- રે ચાર્લ્સ

અમે રાખમાંથીયે બેઠા થવાના,
જલાવો તમે તોયે જીવી જવાના.

ભલે જળ ન સીંચો તે છતાંયે,
અમે ભીંત ફાડીને ઊગી જવાના.

ધખો તમતમારે ભલે સૂર્ય માફક,
સમંદર ભર્યો છે, ન ખૂટી જવાના.

ચલો હાથ સોંપો, ડરો ન લગીરે,
તરી પણ જવાના ને તારી જવાના.

અમે જાળ માફક ગગન આખું ઝાલ્યું,
અમે પંખી એકે ન ચૂકી જવાના ! ...

- હર્ષ બ્રહ્મભટ્ટ

મોકલી જો તું શકે...

મોકલી જો તું શકે મરણ મોકલાવ,

મહેરબાની કર હવે સ્મરણ ન મોકલાવ.

આવવું જો હોય તારે તો આવ રૂબરૂ,

મહેરબાની કરી હવે કારણ ન મોકલાવ.

કે મને ડંખ્યા કરે તારો વિરહ સતત,

વાંઝણી આ ઇચ્છાની નાગણ ન મોકલાવ.

જિંદગીભર હું ચલાવી લઈશ જળ વિના,

મુજ તરસને કાજ તું આ રણ ન મોકલાવ.

યાદ તારી પુરતી છે બાળવા મને,

અગ્નીનાં રૂપમાં શ્રાવણ ના મોકલાવ.

- હર્ષ બ્રહ્મભટ્ટ