શ્યામ ...

 મોરપિચ્છની રજાઈ ઓઢી
તમે સૂઓને શ્યામ,
અમને થાય પછી આરામ...
મુરલીના સૂરનાં ઓશીકાં
રાખો અડખેપડખે.
તમે નીંદમાં કેવા લાગો,
જોવાને જીવ વલખે.
રાત પછી તો રાતરાણી થઈ
મ્હેકી ઊઠે આમ...
મોરપિ્ચ્છ્ની રજાઈ ઓઢી
તમે સૂઓને શ્યામ.
અમે તમારા સપનામાં તો,
નકી જ આવી ચડશું;
આંખ ખોલીને જોશો ત્યારે
અમે જ નજરે પડશું,
નિદ્રા-તંદ્રા-જાગૃતિમાં
ઝળહળભર્યો દમામ......
મોરપિચ્છની રજાઈ ઓઢી
તમે સૂઓને શ્યામ...

-સુરેશ દલાલ

અને છેલ્લે ...

તેથી ગોકુળ મુક્યા પછી મેં મોરલી નથી વગાડી
કારણ કે પછી મને રાધા ક્યાંય મળી નથી........