શબ્દોનાં વન ...

શબ્દોનાં વન, તારા નામનો પવન
પછી જીવવાનું કેવું મજાનું,
આ ગીતો તો ક્યારનાં શોધે છે
સજન તમને મળવાનું બહાનું.
 

દર્પણ પૂછે છે રોજ, આંસુ લૂછે છે રોજ,
ચહેરો ખૂટે છે એક ગમતો,
ઘરની ભીંતોને આજ ઘેલું લાગ્યું છે
એક પડછાયો મુકવો છે રમતો, 

કાનમાં કહું પેલા વાયરાને
આજમાં સંભળાતું નામ તારું છાનું.
 

પીંછું પણ સામેથી મોરને શોધે છે
એવા દિવસોનું કરવું પણ શું?
ગીતોને પંક્તિની પાંખો ફૂટે ને
આ ઉઘડે છે આસ-પાસ તું. 

તું પણ શોધે છે મને મળવાનું બહાનું
એ વાત હવે કેમ કરી માનું? ...
 

આ ગીતો તો ક્યારનાં શોધે છે
સજન તમને મળવાનું બહાનું....

- અંકિત ત્રિવેદી