સહજ તને હું સ્મરું...

સહજ તને હું સ્મરું
મારી બધ્ધી ખુશીઓ તારી હથેળીઓમાં ધરું

સમય વહે છે જાણે ઝરણું વહેતું ખળખળખળ
રૂનો ઢગલો મને અચાનક લાગે છે વાદળ
સ્મરણોની નૌકામાં બેસી દૂર દૂર હું સરું

મારી બધ્ધી ખુશીઓ તારી હથેળીઓમાં ધરું .......

પળને રોપું તો એમાંથી ઊગે પારિજાત
પંખી મારી સામે બેસી કરે છે તારી વાત
મારું ક્યાં કંઈ ચાલે છે અહીં, સમય કહે તે કરું 

મારી બધ્ધી ખુશીઓ તારી હથેળીઓમાં ધરું ........

- હિતેન આનંદપરા